Қазақстанның тарихындағы басты құжат — Ата Заңның тұғырына 30 жыл толуына орай, ел аумағында оның құндылықтарын насихаттауға арналған «ATAZAN_AZAMAT_KZ» республикалық челленджі ұйымдастырылды. Бұл бастама еліміздің негізгі заңының маңыздылығын, мемлекеттің біртұтастығы мен халықтың бірлігін дәріптеуге бағытталған. Шымкент қаласы Полиция департаментінің Көші-қон қызметі басқармасы да бұл патриоттық акциядан тыс қалмады.
Соңғы отыз жыл ішінде еліміз білімді ұрпақ, жаңашыл қоғам, ұлттық болмысын дәріптеген мемлекет ретінде қалыптасты. Бұл жетістіктердің барлығы Конституцияда көрсетілген құндылықтардың арқасында мүмкін болды. «ATAZAN_AZAMAT_KZ» челленджінің басты мақсаты — осы жетістіктерді жас ұрпаққа жеткізу және жаһандану дәуірінде ұлттық бірегейлігімізді жоғалтпай, даму жолында алға қадам басу қажеттілігін көрсету.
Челлендж аясында өткізілген салтанатты рәсімде, 16 жасқа толған жас азаматтар мен азаматшалар Қазақстан Республикасының жеке куәліктерін алды. Бұл тек жай құжат емес, олардың өмірлеріндегі жаңа, жауапты кезеңнің бастамасын білдіреді. Жасөспірімдердің ата-аналары мен ұстаздарының қатысуымен өткен бұл шара өте салтанатты әрі есте қаларлық болды.
Жеке куәліктерді салтанатты түрде табыстау рәсіміне Шымкент қаласы Полиция департаменті бастығының міндетін атқарушысы, полиция полковнигі У.Мылтыков қатысты. Өз сөзінде ол жастарды осынау маңызды оқиғамен құттықтап, былай деді: «Бүгін сіздер Қазақстан Республикасының толыққанды азаматы атанып, құқықтарыңыз бен міндеттеріңізге ие боласыздар. Бұл құжат – сіздердің болашаққа апарар жолдарыңыздағы алғашқы маңызды қадам. Еліміздің болашағы сіздердің қолдарыңызда. Заңды құрметтеп, өз Отанымыздың гүлденуіне үлес қосатын лайықты азамат болыңыздар».
Бұл іс-шара жастарға құқықтық сауаттылықты арттырып, олардың бойында Отанға деген сүйіспеншілік пен құрметті қалыптастыруға бағытталған. Полицияның мұндай патриоттық бастамалары жас буынның саналы, жауапты және болашаққа сеніммен қарайтын азамат болып өсуіне жағдай жасайды. Осылайша, бүгінгі жастар – еліміздің ертеңінің кепілі екенін тағы бір мәрте дәлелдеді.