Бүгін Ішкі істер министрінің келісімімен, Түркістан облысы Полиция департаменті бастығы полиция генерал-майоры Мұрат Талапұлы Қабденовтың бұйрығына сәйкес Төлеби аудандық полиция бөлімінің бастығы лауазымына Қуашбаев Ғалымжан Саттарұлы тағайындалды деп, хабарлаған Төлеби ауданы әкімінің баспасөз қызметі.
Аудан активіне полиция бөлімінің жаңа басшысын Түркістан облысы Полиция департаменті бастығының тергеу жөніндегі орынбасары полковник Бауыржан Зиятаев таныстырды.
Актив отырысында аудан әкімі Еркеғали Әлімқұлов Төлеби ауданында полиция бөлімінің басшысы қызметін екі жыл көлемінде атқарған Бауыржан Батырбекұлына аудан халқы атынан ризашылығын білдіріп, «Алғыс хат» табыс етті.Мәжілісте сөз алған Ғалымжан Саттарұлы өзіне сенім білдірген аудан халқына, департамент басшылығына ауданның қоғамдық қауіпсіздігін қамтамасыз ету жолында еңбек ететініне сенім білдірді.Аудандық полиция бөлімінің жаңа басшысына аудандық мәслихат төрағасы Нұрлан Қойбағаров сәттілік тілеп, ел игілігі жолында еңбек етуге шақырды. Ардагерлер кеңесінің төрағасы Әтірхан Шыңғысбаев жаңа қызметке тағайындалған полиция басшысына батасын берді.Қуашбаев Ғалымжан Саттарұлы 1979 жылы 15 шілдесінде Төлеби ауданында дүниеге келген. 2001 жылы Қазақстан Республикасы Ішкі істері министрлігінің Б.Бейсенов атындағы Қарағанды академиясын бітірген. Ішкі істер органдарында 2001 жылдан бері қызмет атқарады. 2020 жылдың маусым айынан бастап Түркістан облысы, Ордабасы ауданы полиция бөлімі басшысы қызметін абыроймен атқарған.