Бекітілген кестеге сәйкес, аудан әкімі Еркеғали Әлімқұлов «Ашық әкімдік» кеңсесінде тұрғындарды жеке мәселелерімен қабылдады деп, хабарлаған Төлеби ауданы әкімінің баспасөз қызметі.
Қабылдау барысында Алатау, Киелітас, Жоғарғы Ақсу ауылдық округінен және Ленгір қаласының азаматтары өтініштері мен шағымдарын ортаға салып, аудан әкімінің көмегіне жүгінді. Қабылдауға келгендер негізіген жерге қатысты туындаған мәселені сөз етіп, жер қатынастары бөліміне шағымын жеткізді. Шахмат ойынын дамытуға ұсыныс айтып, тұрғын үйге алатын субсидия бойынша сұрақтарын қойды. Жеке кәсіпкер ерекше балаларға арналған Бейбарыс оңалту орталығына ғимарат жалға алуға көмек сұрады. Мәдениет саласы, ағын су, тұрғын үйді жекешелендіру, ауыз су, жол, түңгі жарық жөнінде ұсыныстарын жеткізді.
Еркеғали Амантайұлы қабылдауға жазылған аудан тұрғындарының өтініштерін мұхият тыңдап, шешімнің заңды жолдарын түсіндірді. Көтерілген әр мәселе бойынша жауапты сала мамандарына нақты тапсырма беріп, барлық мәселе заң аясында шешілетінін жеткізді. Айта кетерлігі, аудан әкімі мен оның орынбасарлары бекітілген кестеге сәйкес тұрақты түрде жеке қабылдау өткізуде. Жеке қабылдауға «eOtinish» бірыңғай базасы арқылы немесе аудан әкімі аппаратының әкімшілік және құжаттандыруды қамтамасыз ету бөліміне келіп, жазылуға болады.