«Халық үніне құлақ асатын мемлекет» тұжырымдамасы аясында Төлеби ауданы тұрғындарының пікірлерін ашық айтып, ұсыныстарын жеткізуі үшін аудан әкімі Еркеғали Әлімқұлов тұрақты түрде кездесулер, жеке қабылдаулар өткізуде деп, хабарлаған Төлеби ауданы әкімінің баспасөз қызметі.
Бүгін, аудан әкімдігінде орналасқан ашық кеңседе аудан басшысы Еркеғали Амантайұлы жеке қабылдау өткізіп, тұрғындарды толғандырған сұрақтарға жауап беріп, арыз-шағымын тыңдады.Үш сағатқа созылған жеке қабылдауда гемодиализ – бүйрек дертіне шалдыққан 20 ға жуық азамат келіп, мемлекеттен берілетін бір реттік жәрдемақының мөлшері азайғанына шағым айтып, мәселені шешуге көмек сұрады. Қабылдау барысында жердің мемлекеттік актісін дайындау барысында келтірілген олқылықтарды ретке келтіру, мемлекеттік тұрғын үй қорынан мұқтаж азаматтарға пәтер беру, бірінші мөлтек аудандағы көпқабатты үйдің шатырын жөндеп, ойын алаңшасын орнату сынды проблемалар талқыланды. Жалғыз баспанасы апатты деп танылған азаматты тұрғын үй кезегіне қою, балық шаруашылығын қолға алған кәсіпкердің жеріне қатысты туындаған сұрақтар қойылды. Қазығұрт аудандық мәслихат депутаты бастап келген аудан тұрғындары ауыз суға қатысты өтініштерін айтса, жеке кәсіпкер «Төлеби баба» саябағы аумағына аттракциондар орнату жобасын ұсынды.
Қабылдау барысында тұрғындардың мәселесін шешу жолдары жан-жақты қарастырылды. Көтерілген әрбір мәселеге, барлық сұрақтарға мұқият назар салған аудан әкімі Еркеғали Амантайұлы сала басшыларына мәселелерді зерделеп, заң аясында түйіні тарқатылғанға дейін құқықтық сүйемелдеу жүргізуді тапсырды. Ашық пікір алмасқан аудан әкіміне тұрғындар ризашылықтарын жеткізіп, қариялар ақ батасын берді.