«Қыздың жолы жіңішке» дейді дана халқымыз. Бұл сөздің астарында тек әдеп пен иба ғана емес, сонымен бірге қыз баланың нәзік болмысы, оның қоғамдағы ерекше орны мен жауапкершілігі жатыр. Қазіргі жаһандану дәуірінде, ақпараттық ағымдар мен әлеуметтік қысымдар күшейген заманда студент қыздардың психологиялық саулығын сақтау — кезек күттірмейтін мәселе. Осы орайда, колледжде өткен «Қоршаған ортамен қарым-қатынас» тақырыбындағы ашық кездесу студент қыздардың қажетті мағлұматтар алуымен ғана шектелмей, тұлғалық кемелденуіне бағытталған маңызды қадам болды.
Бұл басқосудың көксегені — жасөспірім қыздардың психологиялық жағдайына жан-жақты қолдау көрсету, олардың қоршаған ортамен (отбасы, құрдастар, оқытушылар, қоғам) дұрыс және сауатты қарым-қатынас орнатуына жол көрсету. Сондай-ақ, бойжеткендердің өз-өзіне деген сенімділігін арттыру, ішкі потенциалын ашу және эмоционалдық интеллектісін дамыту шараның негізгі өзегіне айналды.
Жасөспірімдік кезең мен студенттік шақтың алғашқы жылдары — адам баласының мінез-құлқы қалыптасатын ең күрделі кезеңдердің бірі. Кездесу барысында мамандар студент қыздардың психологиялық портретіне талдау жасап, оларды мазалайтын негізгі факторларға, сырт келбетке, қабілеттерге деген күмән, жаңа ортаға үйрену, құрдастарымен тіл табысу және көңіл-күйдің тез өзгеруі, стресске төзімділіктің төмендігіне тоқталып өтті.
Ашық әңгіме барысында қыздар өздерінің ішкі уайымдары мен сезімдерін еркін жеткізуге мүмкіндік алды. Бұл «психологиялық жеңілдеу» процесіне жол ашты. Студенттер өздерін толғандырған сұрақтарды қоя отырып, жалғыз емес екендіктерін, ұқсас мәселелердің басқаларда да бар екенін түсінді. Қоршаған ортамен қарым-қатынас — бұл тек сөйлесу ғана емес, бұл — өзгенің пікірін құрметтеу және өз позицияңды қорғай білу. Жиын барысында осы бағытта бірнеше маңызды аспектілер талқыланды. Бойжеткен қыз бала үшін ата-анасының қолдауы — басты тірек. Алайда, осы кезеңде ата-ана мен бала арасындағы түсініспеушіліктер жиілейді. Мамандар қыздарға ата-анамен ашық диалог құрудың, өз ойын дөрекіліксіз, дәлелді жеткізудің әдістерін үйретті. Отбасындағы жылулық — сыртқы ортаның суығынан қорғайтын басты қалқан екені баса айтылды. Студенттік ортада бәсекелестік, көреалмаушылық немесе керісінше, жағымсыз топтардың ықпалына түсу қаупі бар. Кездесуде «салауатты шекара» қою мәселесі қозғалды. Қыздарға «жоқ» деп айта білудің маңыздылығы, өзінің қадір-қасиетін түсіретін ортадан алыстаудың қажеттілігі түсіндірілді. Өз-өзіне сенімді қыз — ол өмірдің кез келген қиындығына қарсы тұра алатын, мақсаты айқын тұлға. Жиналыс барысында сенімділікті арттырудың практикалық тәсілдері ұсынылды.
Студенттер белсенді қатысқан психологиялық жаттығулар арқылы өз бойларындағы жасырын қабілеттерді тануға тырысты. «Мен кіммін?», «Менің өмірдегі мақсатым қандай?» деген сұрақтар төңірегінде терең ой қозғалды. Жиында қазіргі заманғы «IT-бикеш», «білімді ару» имиджі талқыланды. Қыз бала тек сұлу ғана емес, сонымен бірге зияткерлік деңгейі жоғары, технологияларды меңгерген, жан-жақты болуы тиіс екені айтылды. Бұл студент қыздардың білімге деген ынтасын арттырып, оқу орнындағы белсенділіктерін күшейтуге бағытталды.
Бұл кездесудің форматы — еркін пікір алмасу болды. Студенттер жалаң лекция тыңдамай, өздерін толғандырған: «Мазасыздықтан қалай арыламын?», «Достарыммен арадағы түсініспеушілікті қалай шешемін?», «Өз-өзіме деген сенімділікті қалай қалыптастырамын?» деген сұрақтарды ашық қойды. Колледж әкімшілігі мен тәрбие бөлімі мұндай шаралардың тұрақты сипатта болатынын атап өтті. Қыз балалармен жұмыс істеу — бұл нәзік әрі үздіксіз процесс. Алдағы уақытта «Сырлас жеңгей», «Ана мен қыз», «Қыз намысы — ұлт намысы» секілді тақырыптық кездесулер сериясын өткізу жоспарлануда.
Бұл жұмыстардың барлығы — жас буынның рухани дамуына, олардың қоғамда өз орнын тауып, бақытты тұлға болып қалыптасуына оң әсерін тигізері сөзсіз. Өйткені, өз-өзіне сенімді, рухани бай және әлеуметтік белсенді бойжеткендер — еліміздің ертеңгі мақтанышы. Осындай ашық форматтағы кездесулердің арқасында біз ертеңгі күнге нық қадам басатын, адамгершілік құндылықтарды ту еткен сапалы ұрпақ тәрбиелей аламыз.