16 желтоқсан — Қазақстан Республикасының Тәуелсіздік күні. Бұл — ата-бабамыздың аңсаған арманы орындалып, егемендігімізді әлемге паш еткен ұлы күн. Осы айтулы мерекеге орай, мектебімізде дәстүрлі форматтан тыс, инновациялық бағыттағы «Қазақстанның қазіргі заманауи келбеті» атты ауқымды іс-шара өтті.
Физика мен информатика бірлестігінің ұйымдастыруымен өткен бұл жиында 8-сынып оқушылары Тәуелсіз Қазақстанның жетістіктерін цифрлық әлемнің тілімен бейнеледі. Бұл іс-шараның басты ерекшелігі — пәнаралық байланыстың жоғары деңгейде көрсетілуі және сенім мен жауаптылықтың құндылықтарын айқындау. Оқушылар тек тарихи деректермен шектелмей, физикалық заңдылықтар мен ақпараттық технологияларды қолдана отырып, еліміздің даму динамикасын көрсетті. Заманауи білім берудің негізі болып табылатын STEAM (Science, Technology, Engineering, Arts, Math) элементтері әрбір жобадан айқын көрініс тапты. 8-сынып оқушылары өздерінің жобаларында бүгінгі таңда әлемдік трендке айналған күрделі құралдарды еркін қолданды. Мәселен, жасанды интеллект (AI) — оқушылар ЖИ көмегімен Қазақстанның болашақтағы футуристік бейнесін жасап, еліміздің инновациялық әлеуетін визуалды түрде көрсетті. Кодтау және бағдарламалау — тәуелсіздік жылдарындағы экономикалық және әлеуметтік көрсеткіштер кодтау арқылы динамикалық графиктер мен цифрлық визуализацияға айналды. 3D модельдеу — еліміздің зәулім ғимараттары мен киелі орындары үш өлшемді кеңістікте қайта жаңғырып, оқушылардың инженерлік шеберлігін паш етті.
Бұл жоба тек мерекелік концерт емес, оқушылардың функционалдық сауаттылығын тексеру алаңы болды. Шара барысында келесідей маңызды құзыреттіліктер ерекше аталды, ақпаратты тек тұтыну емес, оны технология көмегімен жаңа туындыға айналдыру. Шығармашылық ойлау — күрделі сандар мен кодтардан эстетикалық мәні бар бейнелер жасау. Жаңашыл көзқарас — тәуелсіздік құндылығын қазіргі заман жастарының тілімен — технологиямен жеткізу.
«Біздің шәкірттеріміз Қазақстанның дамуын тек оқулықтан оқып қана қоймай, оны өз қолдарымен цифрлық форматта модельдеп шықты. Бұл — жас ұрпақтың бәсекеге қабілеттілігінің айқын дәлелі», — дейді бірлестік мұғалімдері.
Қорытындылай келе, «Жас ұрпақ — ел болашағы» деген ұран бүгінгі шарада нақты іспен дәлелденді. Білімді, креативті және технологияны меңгерген шәкірттеріміз Тәуелсіз Қазақстанның инновациялық келбетін қалыптастыруға дайын екендігін көрсетті. Мектебіміздің осындай заманауи ойлайтын оқушыларымен мақтанамыз!