Түркістан төрінде түркі тілдес елдердің ой маржанын терген қаламгерлері мен баспагерлерін бір арнаға тоғыстырған айтулы шара — «Turkestan Book Fair» халықаралық кітап көрме-жәрмеңкесінің шымылдығы түрілді. Бұл мәдени жиын тек кітап саудасы ғана емес, бауырлас халықтардың әдеби байланысын бекемдеп, ортақ рухани құндылықтарды ұлықтайтын ауқымды алаңға айналды.
Шара Түркістан облысы әкімдігінің тікелей қолдауымен, ТҮРКСОЙ халықаралық ұйымы мен «Фолиант» баспасының ұйымдастыруымен жүзеге асырылуда.
Көрменің негізгі миссиясы — цифрлық заманда кітаптың қадір-қасиетін арттырып, өскелең ұрпақты білімге баулу. Ұйымдастырушылар шараның басты мақсаттарын былайша айқындайды. Оқырман талғамын қалыптастыра отырып, сапалы әдебиет пен заманауи баспа өнімдерін насихаттау, отбасылық оқу мәдениеті арқылы — ата-ана мен баланың бірге кітап оқу үрдісін жаңғырту және халықаралық ынтымақтастық бағытында — Түркі тілдес елдердің баспа саласындағы тәжірибе алмасуын жолға қою.
Көрменің ашылу рәсіміне Түркістан облысы әкімінің орынбасары Ертай Алтаев қатысып, қаланың мәдени статусқа ие болуында мұндай шаралардың орны бөлек екенін атап өтті. Сондай-ақ, ТҮРКСОЙ ұйымының бас хатшысы Сұлтан Раев, белгілі ғалым-қаламгер Құлбек Ергөбек, Әзербайжан баспалар бірлестігінің өкілі Шәміл Садық және Түркі дүниесі Жазушылар одағының төрағасы Ұлықбек Есдәулет жылы лебіздерін білдірді. Спикерлер өз сөздерінде кітап — халықтар арасындағы шекарасыз достықтың нышаны екенін және Түркістанның осы рухани керуеннің алтын қазығына айналғанын тілге тиек етті.
Биылғы жәрмеңкенің ауқымы таңғалдырарлық. Көрмеге Түркия, Өзбекстан, Моңғолия, Әзербайжан, Қырғызстан, Саха Республикасы (Якутия), Ресей және Қазақстаннан 50-ге жуық баспа, кітап саудасы және полиграфиялық ұйымдар өкілдері қатысуда.
Келушілер назарына мынадай өнімдер ұсынылды. Атап айтқанда, классикалық және заманауи әдебиет — Түркі халықтарының ортақ мұрасы. Балалар әдебиеті — танымдық және суретті кітаптар. Ғылыми басылымдар — Түркітану және тарих бағытындағы зерттеулер. Сондай-ақ, полиграфиялық жауһарлар — көркем безендірілген сыйлық басылымдар.
Мәдени іс-шара Түркістан қаласының зәулім Конгресс Холл кешенінде өтуде. Көрме 3 күн бойы (күн сайын сағат 10:00-ден 19:00-ге дейін) өз оқырмандарын күтеді. Кітап сүйер қауым үшін бұл — сирек кездесетін туындыларды автордың қолынан алуға, баспагерлермен тікелей тілдесуге және рухани қазына жинауға таптырмас мүмкіндік.
Құрметті Түркістандықтар және қала қонақтары! Рухани азық іздесеңіз, Конгресс Холлдағы кітап мерекесіне асығыңыздар!