Бүгін – еліміздің тарихында айрықша орын алатын, Қазақстан Республикасының экономикалық дербестігін паш еткен мереке – Ұлттық валюта күні аталып өтеді. 15 қараша күні теңгенің айналымға енгеніне толы жылдар толды, бұл күн – мемлекетіміздің қаржылық тұрақтылығы мен даму бағдарын айқындайтын маңызды меже.
Ұлттық валюта – теңге – Қазақстанның саяси тәуелсіздігінің нышаны ғана емес, сонымен бірге экономикалық тәуелсіздігінің басты кепілі. 1993 жылы теңгенің айналымға енуі елдің өз алдына дербес ақша-несие саясатын жүргізуге мүмкіндік беріп, мемлекеттік қаржы жүйесінің негізін қалады. Бұл қадам тарихи тұрғыдан аса маңызды болды, себебі ол еліміздің экономикалық қауіпсіздігін нығайтуға және инфляцияны тұрақтандыруға жол ашты.
Әрбір теңгенің артында — Қазақстан халқының қажырлы еңбегі, мемлекеттің жүйелі реформалары, тұрақты экономикалық өсім және болашаққа деген нық сенімі тұр. Ұлттық валюта күні қаржы саласы қызметкерлерінің – қаржыгерлердің, банкирлердің, экономистердің – мемлекеттік қаржы жүйесін дамытуға қосқан зор үлесін еске алатын кәсіби мереке болып табылады. Олардың жауапты қызметі республикалық және жергілікті бюджеттердің тиімді жоспарлануын, мемлекеттік қаражаттың ашық әрі мақсатты жұмсалуын қамтамасыз етеді.
Теңгенің тұрақтылығы – бұл ел экономикасының тұғырын берік ұстаудың кепілі. Ұлттық валюта күнін мерекелеу – Қазақстанның әлемдік қаржы жүйесіндегі орнын нығайтуға, инвестициялық тартымдылықты арттыруға және ішкі экономикалық әлеуетті толық ашуға деген ұмтылысын білдіреді. Теңгенің әрі қарай нығаюы халқымыздың әл-ауқатын арттыруға және ұлттық байлықтың әділ бөлінуіне негіз болады.
Мереке күні еліміздің берекесі мен бірлігі артып, тәуелсіз еліміздің қаржылық қуаты нығая беруіне тілек білдіреміз. Ұлттық валюта – теңгемен бірге Қазақстанның жарқын болашағы дами берсін!