ШЫМКЕНТ ҚАЛАСЫНДА «ЗАҢ ЖӘНЕ ТӘРТІП» ҚАҒИДАТЫН ІСКЕ АСЫРУ АЯСЫНДА Т. РЫСҚҰЛОВ АТЫНДАҒЫ №25 МЕКТЕП-ГИМНАЗИЯДА ОҚУШЫЛАР ҮШІН ПОЛИЦИЯ ҚЫЗМЕТКЕРЛЕРІНІҢ ҚАТЫСУЫМЕН ПРОФИЛАКТИКАЛЫҚ ҚҰҚЫҚТЫҚ САҒАТ ӨТКІЗІЛДІ.
Бұл маңызды кездесудің негізгі мақсаты – жасөспірімдердің құқықтық мәдениетін қалыптастыруға ықпал ету және олардың арасындағы кез келген құқық бұзушылықтың алдын алу болып табылады. Полицияның мектептердегі мұндай жұмысы оқушыларға қазіргі заман қауіптерінен қорғануды үйретеді.
Кездесу барысында полиция қызметкерлері оқушылармен бірнеше өзекті мәселелерді талқылады. Атап айтқанда;
- Киберқылмыстар үшін жауапкершілік: Жасөспірімдердің интернет арқылы жасалатын алаяқтыққа қатысқаны үшін қарастырылған қылмыстық жауапкершіліктер мен одан сақтану жолдары түсіндірілді.
- Есірткі қолданудың қауіптері: Нашақорлықтың денсаулыққа, психикаға тигізетін зияны және есірткіні таратуға қатысудың ауыр заңды салдары туралы ескертілді.
- Зорлық-зомбылық пен буллингтің салдары: Мектеп ортасындағы және отбасыдағы зорлық-зомбылыққа, сондай-ақ буллингке қатысты заңнамалық талаптар мен оны тоқтатудың тәсілдері талқыланды.
- Өз құқықтарын қорғау тәсілдері: Қиын жағдайларда және құқықтары бұзылған кезде оқушылардың қалай әрекет етуі керектігі туралы нақты кеңестер берілді.
Кездесуге қатысқан спикерлер өздерінің тәжірибесінде кездескен нақты мысалдарды келтіру арқылы оқушылардың назарын аударды. Бұл тәсіл жастарға құқық бұзушылықтың салдары тек теориялық қана емес, нақты өмірде орын алатындығын айқынырақ ұғынуға мүмкіндік берді. Оқушылар полицейлерге сұрақтарын қойып, толық жауаптар алды. Ұйымдастырушылар мұндай кездесулер құқық бұзушылықтың ерте алдын алуға және мектеп қабырғасында қауіпсіз білім беру ортасын қалыптастыруға зор ықпал ететінін атап өтті. Полиция департаменті өз кезегінде балаларды заңды құрметтеуге және жауапкершілікті сезінуге шақырды.