Қазіргі таңда Қазақстан Республикасының мемлекеттік саясаты мен Мемлекет басшысы Қасым-Жомарт Тоқаевтың «Әділетті Қазақстан» тұжырымдамасы аясында халықтың әл-ауқатын арттыру, тұрғындарды сапалы әрі қолжетімді баспанамен қамтамасыз ету – басты стратегиялық басымдықтардың бірі болып табылады. Мемлекет басшысы өзінің бағдарламалық сөздерінде: «Баспана – әрбір отбасы үшін ең басты қажеттілік, тұрақтылық пен бақыттың берік іргетасы. Әлеуметтік осал санаттағы азаматтар мен көпбалалы отбасыларды баспанамен қамту – мемлекеттің басты міндеті» деп үнемі баса айтып келеді.
Осы тұрғыдан алғанда, Түркістан облысының тарихи-мәдени мұраға бай, шежірелі өңірі – Созақ ауданында Астана күні мерекесі қарсаңында тұрғындардың қуанышын еселеген ерекше салтанатты оқиға орын алды. Аудан орталығы Шолаққорғандағы Жеткіншек мөлтек ауданында 25 отбасыға жаңа пәтердің кілті салтанатты түрде табысталды. Әлеуметтік осал санаттағы азаматтар мен көпбалалы отбасылардың бірі ұзақ күткен кезектің өтеуін көрсе, енді бірі балаларының болашағына берік тұғыр болатын жаңа шаңыраққа қол жеткізді.
Жаңа баспаналардың кілтін табыстау рәсіміне аудан тұрғындары, еңбек ардагерлері, зиялы қауым өкілдері мен жаңа қоныс иелері белсене қатысты. Іс-шара барысында Созақ ауданының әкімі Мұхит Тұрысбеков тұрғындарды жаңа қоныстарымен құттықтап, баспаналы болу – әрбір отбасы үшін ең үлкен бақыттың бастауы екенін атап өтті:
«Мемлекет басшысының халықтың өмір сүру сапасын арттыру жөніндегі тапсырмалары аясында ауданымызда тұрғын үй құрылысы қарқынды жүзеге асырылып келеді. Баспана – әр шаңырақтың берекесі, отбасының бақыты мен тұрақтылығының негізі. Бүгінгі қуаныш – әлеуметтік қолдау мен тұрғындардың әл-ауқатын жақсартуға бағытталған жұмыстардың жемісі. Алдағы уақытта да бұл бағыттағы жұмыстар жүйелі түрде жалғасады», – деді аудан басшысы.
Сондай-ақ аудандық мәслихат төрағасы Ордабек Жәмиев қоныс иелеріне ақжарма тілегін арнап, жаңа шаңырақтардың құтты, берекелі болуын тіледі. Салтанатты сәтте жаңа пәтер иелері де жүрекжарды лебіздерін білдіріп, мемлекет тарапынан көрсетілген қамқорлыққа өздерінің шынайы ризашылықтарын жеткізді.
Еске сала кетейік, тұрғын үйге мұқтаж азаматтарды есепке қою және баспанамен қамтамасыз ету жұмыстары қолданыстағы заңнама талаптарына сәйкес «Отбасы банк» АҚ-ның бірыңғай ақпараттық жүйесі арқылы жүзеге асырылады. Тұрғын үй алушылар азаматтардың мәртебесі, тұрғын үйге мұқтаждық деңгейі және кезектегі орны негізінде цифрлық жүйе арқылы әділ әрі ашық анықталады. Бұл жүйе тұрғын үй кезегінің ашықтығын қамтамасыз етіп, әлеуметтік әділеттілік қағидаттарын толық жүзеге асыруға мүмкіндік береді.
Соңғы жылдары Жеткіншек мөлтек ауданында тұрғын үй құрылысы қарқынын бәсеңдеткен емес. Бұған дейін Мемлекеттік рәміздер күні мерекесінде 29 отбасы жаңа қонысқа қол жеткізсе, бүгін тағы 25 отбасының арманы орындалды.
Аудандағы тұрғын үй құрылысының бүгінгі жай-күйі жайында сөз қозғасақ, пайдалануға дайын баспаналар — қазіргі таңда құрылысы аяқталған 22 пәтердің тиісті құжаттандыру жұмыстары жүргізілуде. Қажетті заңды рәсімдер толық аяқталған соң бұл баспаналар да кезең-кезеңімен өз иелеріне табысталатын болады. Салaнып жатқан нысандар негізінен аудан орталығында 20 пәтерлі тұрғын үйлердің құрылыс-монтаждау жұмыстары қарқынды жалғасуда. Инвесторлар мен демеушілердің қолдауына тоқталсақ, бұдан бөлек, «Қазатомөнеркәсіп» ұлттық атом компаниясы» АҚ-ның еншілес ұйымдарының демеушілігімен жаңғырту бағдарламасы аясында 16 пәтерлі екі қабатты тұрғын үйлердің құрылысы сәтті жүзеге асырылуда. Қорытындылай келгенде, Астана күні қарсаңында Созақ ауданында 25 отбасының жаңа баспанаға қол жеткізіп, шаңырақтарының шаттыққа бөленуі – өңірдегі әлеуметтік-экономикалық дамудың, мемлекеттік қамқорлықтың нақты нәтижесі. Жаңа қоныс иелерін қуаныштарымен шын жүректен құттықтаймыз! Жаңа шаңырақтардың іші әрқашан құт-берекеге, балалардың шат күлкісіне толсын! Созақ өңірі өркендеп, тұрғындардың әл-ауқаты арта бергей деген ниеттеріміз қабыл бола берсін.