Қазақстанның кең-байтақ даласы мен таулы аймақтары өзінің қайталанбас ландшафтымен, бай флорасы мен фаунасымен әрқашан көз тартады. Соның ішінде Түркістан облысының ең сырлы, шежірелі әрі табиғаты өзгеше өңірлерінің бірі – киелі Созақ өлкесі.
Жыл сайын жаңаша қырынан танылатын бұл тұмса әлем жаздың жаймашуақ күндері өзінің кезекті ғажайып келбетіне еніп, келген жанды бірден баурап алады. Жыл мезгілдері ауысқан сайын құбылып, табиғаттың төл туындысына айналатын Созақ даласы – ұлттық таным мен табиғи гармонияның шынайы мекені.
Жаздың аптап ыстығымен қатар келетін бұл мезгілде Қаратау жотасының бөктерлері мен ұшы-қиырсыз кең жазирасы таңғажайып ақ түске малынады. Көз жетер көкжиекке дейін созылып жатқан гүлдер алқабы табиғаттың шебер қылқаламынан шыққан картинадай көз алдыңызға ерекше сұлулықты әкеледі. Бұл – туған жердің, атамекеннің ұлы далалық ажары. Созақ даласын ақ кілемдей көмкеріп, көздің жауын алып жатқан бұл ғажайып гүлдердің жалаң гүлді құлқайыр болуы ықтимал. Бұл өсімдік – Қаратау өңірінің табиғи климатына жерсінген, бойы биік, сабағы берік, өзіндік сәні бар дала өсімдіктерінің бірі.
Биік сабағына тізіле өскен нәзік ақ гүлдері мен жұмсақ түкті, әсем тілімденген жапырақтары айналаға ерекше сәуле мен көрк беріп тұр. Жол бойымен созылып жатқан қалың жасыл желек пен ақ гүлдердің табиғи үйлесімі жолаушылар мен саяхатшыларға ұмытылмас әсер қалдырады. Даланың ерке салқыны – самал желмен баяу тербелген бұл ақ гүлдер ғасырлар бойы құпиясын ішке бүккен кең даланың терең сырын шертіп тұрғандай әсер береді. Әрбір қадам сайын табиғаттың бұл көз тоймас көрінісіне еріксіз сүйсінесіз.
Қаратау жоталарының географиялық орналасуы мен Созақ ойпатының микроклиматы мұнда сирек кездесетін флора өкілдерінің вегетациялық кезеңін ерекше етеді. Көктемде Қаратаудың қоңыр белдері алдымен қызғалдақтардың сирек кездесетін түрлерінің қызыл нұрымен құлпырып, көзді қуантса, жаз ортасына қарай ақ құлқайырдың үлбіреген, әсем әлеміне оранады.
Бұл маусымдық құбылыстар өңірдің эколог мамандары мен биология саласының зерттеушілері үшін де, эко-туристер үшін де үлкен қызығушылық тудырады. Биік тау бөктерлерінен соққан таза ауа мен гүлдердің хош иісі араласып, өңірді табиғи фитотерапиялық аймаққа айналдырады. Туған өлке сұлулығы осындай табиғи құбылыстармен өзгеше бедерленеді.
Дала төсіне төгілген ақ мәрмәрдей көркем өрнек пен туған жердің осындай ғажайып көріністерін аялау, табиғи тепе-теңдікті сақтау – баршамыздың ортақ азаматтық, адамгершілік парызымыз болып табылады. Елімізде жүзеге асырылып жатқан «Таза Қазақстан» экологиялық акциясы аясында да мұндай сирек кездесетін далалық гүлдер алқабын қорғау, қоқыс тастамау және өсімдіктер дүниесін бейберекет отаудан сақтау ерекше маңызға ие.
Табиғи биоалуантүрлілікті сақтау арқылы біз, елешек ұрпаққа Созақтың тұмса табиғатын аман-есен аманаттаймыз. Өңірдегі эко-туризм мен фото-туризмнің дамуына берік негіз қалаймыз. Қоғамда жоғары экологиялық мәдениет пен туған жерге деген сүйіспеншілікті қалыптастырамыз.
Созақ өңірі – тек бай тарихымен, шертпе күйімен және суфистік ескерткіштерімен ғана емес, сонымен бірге осындай сырлы да сұлу табиғатымен де ерекше. Қаратау бөктеріндегі ақ құлқайырлар алқабы – табиғаттың адам баласына сыйлаған ғажайып туындысы.
Туған жердің әрбір тасы мен гүлін қадірлеп, оның сұлулығын қорғау – азаматтық парыз. Созақтың табиғаты қашанда гүлденіп, өз сұлулығымен елімізді таңғалдыра берері сөзсіз.