Мемлекеттің әлеуметтік саясатының өзегі — әрбір азаматтың, әсіресе тағдыр тауқыметіне тап болған балалардың құқығын қорғау және оларға лайықты өмір сүру жағдайын жасау. Бұл ретте «Халық үніне құлақ асатын мемлекет» тұжырымдамасы аясында құрылған мобильді топтардың жұмысы ерекше маңызға ие. Жақында Көксарай ауыл округінен келіп түскен кезекті «сигнал» бойынша мамандар жедел әрекет етіп, қиын жағдайдағы және ерекше білім беру қажеттіліктері бар бала тәрбиелеп отырған отбасының тыныс-тіршілігімен танысты.
Кез келген қоғамда қиындыққа тап болған, бірақ көмек сұрауға мүмкіндігі немесе батылы жетпейтін отбасылар кездеседі. Көксарай ауыл округінен келіп түскен хабарлама — мамандар үшін жай ғана ақпарат емес, бұл — баланың қауіпсіздігі мен болашағына қатысты шұғыл шақыру. Осыған байланысты құрамында психологтар, әлеуметтік қызметкерлер мен тиісті сала мамандары бар мобильді топ мүшелері аталған мекенжайға барып, жағдайды өз көздерімен көрді.
Үйде оқитын баласы бар отбасылар мемлекеттің ерекше қамқорлығында болуы тиіс. Өйткені, мұндай балаларға тек білім ғана емес, сонымен бірге олардың физикалық және эмоционалдық ерекшеліктеріне сай келетін жайлы орта қажет. Тексеру жұмыстарының басты мақсаты — жазалау емес, қолдау көрсету және баланың құқығының бұзылмауын қадағалау болды. Мобильді топ мүшелері мекенжайға барған сәтте ең алдымен отбасының әлеуметтік-тұрмыстық деңгейіне назар аударды. Үйдегі тазалық, жылу жүйесі, баланың тамақтануы мен демалуына арналған орын — мұның бәрі баланың психологиялық саулығына тікелей әсер ететіні шындық.
Тексеру барысында мынадай негізгі бағыттар зерделенді, баланың үйде білім алуына жағдай жасалған ба? Оқу үстелі, жарық және қажетті техникалық құралдардың (компьютер, интернет) бар-жоғы, мектеп бағдарламасына сәйкес оқулықтар мен кеңсе тауарларының жеткіліктілігі және отбасы мүшелерінің арасындағы қарым-қатынас, балаға көрсетілетін қамқорлық пен жылулық деңгейі бағаланды. Себебі, мамандар үшін басты мәселе — баланың оқшауланып қалмауы. Үйде оқитын баланың әлеуметтік ортамен байланысы үзілмеуі үшін ата-ананың қандай әрекет жасап жатқаны да назардан тыс қалмады.
Қиын жағдайдағы отбасылармен жұмыс істеуде эмоционалдық қолдаудың маңызы зор. Көбінесе ата-аналар тұрмыстық тауқыметтің әсерінен баланың психологиялық қажеттіліктерін екінші орынға ысырып қояды. Осы орайда, мобильді топ құрамындағы психологтар отбасы мүшелерімен жеке сұхбат жүргізді. Ата-анамен жүргізілген профилактикалық әңгіме барысында бала тәрбиесіне қатысты маңызды аспектілер түсіндірілді. Баланың білім алуға деген құштарлығын ояту үшін үй ішіндегі ұрыс-керісті болдырмау, балаға мейіріммен қарау және оның жетістіктерін мадақтау қажеттігі айтылды.
Зерделеу жұмыстарының қорытындысы бойынша отбасына қатысты бірқатар әлеуметтік шаралар қабылданды. Егер отбасының материалдық жағдайы оқу құралдарын алуға жетпесе, бұл мәселе білім бөлімі мен демеушілер арқылы шешілетін болады. Мобильді топ мүшелері отбасы мүшелеріне мемлекеттік жәрдемақыларды рәсімдеу, әлеуметтік көмек алу жолдарын да егжей-тегжейлі түсіндірді.
Отбасы — мемлекеттің іргетасы. Ал сол іргетастың берік болуы — әрбір ауыл округіндегі, әрбір мекемедегі мамандардың жұмысына байланысты. Көксарайдағы мобильді топтың әрекеті — басқа өңірлерге үлгі боларлық іс. Осы ретте тұрғындар назарына, егер айналаңызда көмекке мұқтаж болса, баланың құқығы тапталып жатқан немесе өмірлік қиын жағдайға тап болған отбасыларды көрсеңіз — бей-жай қарамағаныңыз жөн. Себебі, сіздің берген «сигналыңыз» бір баланың тағдырын өзгертуі мүмкін.