Қазақстан Республикасы Президентінің арнайы Жарлығымен Түркістан қаласына ерекше тарихи-мәдени және әкімшілік мәртебе берілгені белгілі. Бұл мәртебе қаланы дамытуға, оның инфрақұрылымын жаңғыртуға және ең бастысы, сәулеттік келбетін біріздендіруге жоғары талаптар қояды. Осы талаптарды жүзеге асыру мақсатында қаланың бірыңғай дизайн-коды бекітілді.
Дизайн-код – бұл жай ғана ережелер жиынтығы емес, бұл қаланың мәдени мұрасын сақтай отырып, оны заманауи және тартымды ететін, әрбір элементтің үйлесімділігін қамтамасыз ететін визуалды құжат. Ол ең алдымен, қалалық ортадағы көрнекі ақпараттарға, атап айтқанда, маңдайшалар мен сыртқы жарнамаларға қатысты.
Қазіргі уақытта Түркістан қаласының тарихи және заманауи бөліктеріндегі әрбір ғимараттың сәулеттік стилінің сақталуына бағытталған кешенді жұмыстар басталып кетті. Қала әкімдігінің Сәулет және қала құрылысы бөлімінің мамандары қала аумағындағы кәсіпкерлік нысандарын аралап, инспекциялық тексерулер жүргізуде.
Тексерудің негізгі міндеті – кәсіпорындардың маңдайшалары мен орналастырған жарнамаларының бекітілген дизайн-код талаптарына қаншалықты сәйкес келетінін анықтау. Өкінішке орай, көптеген нысандар әлі де ескі стандарттармен жұмыс істеп тұр, сондықтан мамандар талапқа сай келмейтін маңдайшалар мен жарнамалар бойынша нақты ескертулер мен ұсыныстар беруде.
Қаланың Сәулет және қала құрылысы бөлімі хабарлағандай: «Біздің басты мақсатымыз – жарнамаларды жаппай алып тастау емес, оларды қаланың сәулеттік тұтастығына зиян келтірмейтіндей етіп ретке келтіру. Нысан қасбеттерінің біріздендірілген үлгіде болуы – қаланың сәулеттік келбетін сақтауға бағытталған ең маңызды талаптардың бірі. Бұл тек әдемілік үшін емес, бұл қалаға деген құрмет және оның мәртебесін айқындау.» Осы ретте кәсіпкерлердің жауапкершілігі дизайн-код талаптарын сақтау процесіне ең алдымен кәсіпкерлік иелері белсенді атсалысуы тиіс. Себебі, әрбір дүкен, кеңсе немесе қызмет көрсету орнының маңдайшасы – қала көшесінің ажырамас бөлігі. Егер әрбір кәсіпкер дизайн-кодта көрсетілген шрифт, түс гаммасы, материал және орналасу биіктігі сияқты параметрлерді сақтайтын болса, Түркістанның көшелері көркем, ұқыпты және тарихи стилі сақталған болып шығады.
Қазіргі инспекциялық жұмыстар ескерту беру сатысында тұр. Кәсіп иелеріне берілген ескертпелерді назарға алып, белгіленген мерзім ішінде маңдайшаларды бекітілген үлгіге сәйкестендіру қажет. Бұл қажеттілікті елемеу, заңнамаға сәйкес, кейіннен айыппұл санкцияларына немесе жарнама құрылымын мәжбүрлі түрде демонтаждауға әкелуі мүмкін.
Барша кәсіп иелерін қаланың сәулеттік келбетін сақтауға атсалысуға, дизайн-код талаптарын оқып-үйренуге және берілген ескертпелерді тез арада орындауға шақырамыз. Біздің ортақ міндетіміз – Түркістанды тек тарихи орталық қана емес, сонымен бірге ең әдемі және бірізді қалалардың біріне айналдыру.