«Мен, Қазақстан Республикасының мемлекеттік қызметшісі, өз Отаныма — Қазақстан Республикасына адал әрі кәсіби тұрғыда қызмет етуге… ант етемін!» деген мемлекеттік қызметке қабылданған жастардың толқынысы мен тебіренісі жайында әсте, сөзбен айтып жеткізу мүмкін емес. Мұнан бөлек, буын бұрқырап, заман жаңарған сайын мемлекеттік басқару жүйесіне жаңа леп, соны серпін мен заманауи біліммен қаруланған жас кадрлардың келуі — заңдылық. Кез келген мемлекеттің болашағы оның интеллектуалды, отаншыл және адал жастарының қолында. Әсіресе, билік пен бұқараның арасындағы алтын көпір саналатын мемлекеттік қызмет саласына қадам басқан әрбір жас маман үшін ант қабылдау сәті — жай ғана заңдылық емес, өмірінің ең жауапты, ең қастерлі белесі болып табылады.
23 маусым — Мемлекеттік қызметшілер күніне арналған Төлеби ауданы әкімдігіндегі салтанатты жиынның ең толқынысты әрі тарихи сәті жас мамандардың ант қабылдау рәсімі болды. Мемлекеттік қызмет қатарына жаңадан қабылданған, байқау іріктеулерінен сүрінбей өтіп, өз білімі мен біліктілігін дәлелдеген бірнеше жас маман Отан мен халық алдында салтанатты түрде ант берді. Аталған шараға Төлеби ауданының әкімі Еркеғали Әлімқұлов, сала ардагерлері, бөлім басшылары мен БАҚ өкілдері қатысты.
Мемлекеттік тудың жанында, жүрегіне қолдарын қойып, ант мәтінін тебірене оқыған жас мамандардың жүзінен үлкен толқыныс пен мақтаныш сезімі байқалды. Ант қабылдау рәсімі — жас мамандардың мемлекеттік қызметтегі алғашқы маңызды қадамдарының бірі ретінде өтіп, олардың заң алдындағы, Отан мен халық алдындағы жауапкершілігін нақты айқындап берді.
Бұл рәсімнің негізгі тәрбиелік және саяси мәні өте терең. Ант беру арқылы жас маман өзінің жеке мүддесінен мемлекет пен халықтың мүддесін жоғары қоятынын сезінеді. Ант мәтініндегі әрбір сөз қызметшіні Қазақстан Республикасының Конституциясын қатаң сақтауға, заңдылықты бұзбауға міндеттейді. Салтанатты түрде берілген серт жас маманның алдағы уақытта жемқорлықтан, құқық бұзушылықтан және этикаға жат қылықтардан аулақ болуына ішкі рухани тежегіш қалыптастырары сөзсіз. Аудан әкімі Еркеғали Әлімқұлов ант қабылдаған жас мемлекеттік қызметшілерді кәсіби мерекелерімен және өмірлеріндегі жаңа белестің басталуымен арнайы құттықтады. Аудан басшысы жас мамандарға үлкен сенім артатынын жеткізе отырып, мемлекеттік қызметтің оңай жол еместігін, оның артында үлкен жауапкершілік тұрғанын шегелеп айтты.
— «Ел мүддесіне адал қызмет ету — үлкен бақыт әрі өлшеусіз жауапкершілік. Бүгін сіздер тек ант оқыған жоқсыздар, сіздер өз тағдырларыңызды мемлекет тағдырымен байланыстыруға серт бердіңіздер. Халық сіздердің кәсіби біліктіліктеріңізге, мәдениеттіліктеріңізге қарап тұтас мемлекеттік аппаратқа баға береді. Сондықтан үнемі ізденісте болып, білімдеріңізді арттырып, халық игілігі жолында аянбай еңбек етулеріңіз қажет», — деді Еркеғали Амантайұлы.
Аудан әкімі жастарды қазіргі технологиялық дамыған заманда жан-жақты болуға, мемлекеттік қызметтерді электронды форматта көрсету сапасын арттыруға және тұрғындармен жұмыс істеуде барынша ашық, сыпайы болуға шақырды. Мерекелік жиында мемлекеттік қызметтің қоғамдағы маңызы кеңінен айтылып, халыққа сапалы қызмет көрсетудің негізгі тетіктері талқыланды.
Қазіргі таңда Төлеби ауданының әкімшілік аппараты өз жұмысында келесі маңызды қағидаттарды берік ұстанады. Мәселен, кез келген шешім, мейлі ол қарапайым анықтама беру болсын немесе ауқымды жер мәселесі болсын, тек заң шеңберінде және әділ атқарылуы тиіс. Жас мамандарға заң нормаларын жетік білу міндеттелді. Мұнан бөлек, жаңадан келген мамандар арасында парақорлық пен тамыр-таныстыққа мүлдем төзбеушілік мәдениетін қалыптастыру — басты назарда болатыны мен мемлекеттік қызметшінің ең басты капиталы — оның таза абыройы екені айтылды.
Сондықтан да, «Халық үніне құлақ асатын мемлекет» тұжырымдамасы бойынша әрбір қызметші азаматтардың өтініштеріне дер кезінде жауап беріп, бюрократия мен сөзбұйдалыққа жол бермеуі қажет. Нәтижелілікті дәріптеу мақсатында орындалған жұмыс қағаз бетіндегі есеп үшін емес, нақты тұрғынның мәселесін шешу арқылы, ауданның әлеуметтік-экономикалық дамуына оң әсерін тигізуімен бағаланады.
Бүгінгі таңда қоғамдық тұрақтылық пен ұлттық қауіпсіздікке қауіп төндіріп отырған келеңсіз құбылыстардың бірі — жастар арасындағы лудомания (құмар ойындарға тәуелділік), синтетикалық есірткі құрығы және әлеуметтік желілердегі рухани жұтаңдық екені ащы да болса шындық. Осы тұрғыда Төлеби ауданының мемлекеттік қызметіне жаңадан қосылған жас буынның алдында үлкен идеологиялық міндет тұр. Мемлекет басшысының қоғамда «Салауатты сана» қалыптастыру жөніндегі тапсырмасы аясында жас мамандар нақты жұмыстар атқаруы тиіс.
Жас мемлекеттік қызметші — замандастарына, ауыл жастарына үлгі болуы керек. Оның бос уақытын кітап оқуға, спортпен шұғылдануға, интеллектуалды дамуға арнауы — айналасындағы құрбы-құрдастарының құмар ойындар сияқты жат қылықтардан аулақ болуына септігін тигізеді. Мемлекеттік қызметшінің моральдық келбеті мінсіз болуы шарт.
Жас мамандар өздерінің заманауи тілде сөйлеу, әлеуметтік желілерді тиімді пайдалану дағдыларын қолдана отырып, аудан көлемінде лудомания мен нашақорлықтың алдын алу бойынша креативті жобаларды іске асыруы қажет. Тұрғындар арасында, мектептер мен колледждерде «Салауатты сана» жобасын насихаттап, жастарды пайдалы еңбекке, кәсіпкерлікке және бұқаралық спортқа бағыттау — жаңадан ант қабылдаған мамандардың да негізгі қоғамдық міндетінің бірі.
Салтанатты жиында сөз алған мемлекеттік қызмет саласының ардагерлері де жас әріптестеріне өздерінің жүрекжарды тілектері мен өмірлік тәжірибелерін бөлісті. Олар мемлекеттік қызметтің ыстығы мен суығына төзіп, абыроймен ардагер атанған заманды еске ала отырып, жастарға қызметте алдынан шығатын қиындықтарды ақылмен, сабырмен жеңудің жолдарын айтты.
Жас мамандар өз кезегінде, үлкендердің ақылын тыңдап, берілген сертке ешқашан қиянат жасамауға, Төлеби ауданының гүлденуі жолында барлық күш-жігерлерін, білімдерін жұмсайтындықтарын айтып, нық уәде берді. Салтанатты іс-шара соңында жас қызметшілерге естелік сыйлықтар мен арнайы төсбелгілер табыс етілді.
23 маусым — Мемлекеттік қызметшілер күні аясында өткен жас мамандардың ант қабылдау рәсімі Төлеби ауданының кадрлық әлеуетін жаңа белеске көтерді. Бүгін Отан алдында серт берген жас қызметшілерді маңызды қадамдарымен шын жүректен құттықтап, Сіздердің бойларыңыздағы жастық жалын, асқақ рух және заманауи білім еліміздің игілігіне қызмет етсін. Берген анттарыңызға адал болып, халықтың алғысы мен құрметіне бөлене беріңіздер дейміз.