Елдің ертеңі, ұлттың болашағы – бүгінгі мектеп қабырғасында тәрбиеленіп жатқан жас буын. Ал жас ұрпақтың бойына отансүйгіштік рухты егу, оларды ұлттық құндылықтардың уызына қандырып өсіру – қоғамның басты міндеттерінің бірі. Отанға деген махаббат тек құрғақ сөзбен емес, жүректен шыққан әуезді әнмен, өнермен және терең тәрбиемен қалыптасады. Осы асқақ мақсатты ту еткен тағылымға толы, тәрбиелік мәні зор шара Түркістан облысы, Сарыағаш ауданы, Қабланбек ауылында орналасқан «О.Жәутіков» атындағы жалпы білім беретін мектебінде болып өтті. Қазақстан халқы Ассамблеясы жанындағы Аналар кеңесінің ұйытқы болуымен өткен «Айбын» атты патриоттық әндер байқауы оқушылардың жүрегінде мақтаныш сезімін ұялатқан ерекше оқиғаға айналды.
Ұлттық тәрбиенің алтын діңгегі – ананың аялы алақаны мен оның берген бағыт-бағдары. Қазақстан халқы Ассамблеясы жанындағы Сарыағаш ауданы, Қабланбек ауылының Аналар кеңесінің төрайымы Айтбаева Алтынай Серікбайқызы аймақтың рухани өмірін жандандыруға, мектеп оқушылары арасында имандылық пен отансүйгіштік қасиеттерді сіңіруге үнемі белсене араласып келеді.
Алтынай Серікбайқызының тікелей мұрындық болуымен болуымен ұйымдастырылған бұл байқау заманауи мектеп қабырғасындағы тәрбие жұмыстарының деңгейін жаңа сатыға көтерді. Шараның басты мақсаттары ретінде келесі маңызды бағыттар айқындалды. Атап айтқанда, жасөспірімдердің бойында туған жерге, атамекенге, көк байрағымыз бен еліміздің тәуелсіздігіне деген құрмет сезімін қалыптастыру. Қазақтың патриоттық ән өнерін, музыкалық мұрасын жастар арасында кеңінен насихаттау. Мектеп оқушыларының арасындағы дарынды, өнерлі балаларды анықтап, олардың сахналық мәдениетін дамытуға жағдай жасау. «О.Жәутіков» атындағы жалпы білім беретін мектептің акт залы байқау өтетін күні айбынды әуендер мен жас дарындардың жалынды үндеріне толды. Сайысқа мектептің әр сыныбынан іріктеліп шыққан, музыкаға жаны құштар, патриоттық рухы биік оқушылар қатысты. Әрбір қатысушы бұл сайысқа үлкен жауапкершілікпен, айтарлықтай дайындықпен келгені алғашқы сәттен-ақ байқалды.
Сахна төріне шыққан жас өнерпаздар елге, жерге деген шексіз сүйіспеншілікті паш ететін, тарихтың терең қойнауынан сыр шертетін және бүгінгі Тәуелсіз Қазақстанның айбынын асқақтататын шығармаларды нақышына келтіре орындады. Қатысушылардың орындауындағы әрбір ән көрермендер мен ұстаздар қауымының, ата-аналардың ыстық ықыласына бөленіп, залдан ду қол шапалақ тудырды. Оқушылардың сахналық киім үлгісі, өздерін сахнада ұстау мәдениеті мен әннің ішкі мазмұнын көрерменге жеткізе білу шеберлігі шараның деңгейін өте жоғары етіп көрсетті.
Өнер сайысы болғаннан кейін, оның ішіндегі ең үздіктерді анықтау – әділқазылар алқасына оңайға түскен жоқ. Себебі, қатысқан әрбір баланың дауыс ырғағы, ән таңдаудағы талғамы мен патриоттық сезімі ерекше жоғары деңгейде болды. Жас буынның орындаушылық қабілетін бағалау үшін арнайы құрылған қазылар алқасы келесі өлшемшарттарға баса назар аударды. Әннің ноталарын таза айту, дауыс мүмкіндігін дұрыс пайдалана білу, қатысушының киім үлгісі, көрерменмен байланыс орната алуы және толқуды жеңіп, өзін еркін ұстауы және патриоттық шығарманың рухын, оның ішкі драмасы мен жігерін тыңдаушының санасына жеткізе алу қасиеті. Тартысты әрі қызықты өткен сайыс нәтижесінде әділқазылар алқасы ең үздік өнер көрсеткен, дауысымен де, айбынымен де ерекшеленген оқушыларды анықтады. Жеңімпаздар мен жүлдегерлер мектеп басшылығы мен Аналар кеңесінің атынан арнайы марапаттарға ие болып, Алғыс хаттармен марапатталды. Бұл марапаттар жас дарындардың болашақта өнер жолында, немесе басқа да салаларда биік белестерді бағындыруына үлкен мотивациялық серпін берері сөзсіз.
Осындай игі де мазмұнды шаралардың мектеп қабырғасында тұрақты түрде өтіп тұруы — кездейсоқтық емес. Бұл — Мемлекет басшысының «Адал азамат» тұжырымдамасы мен қоғамда «Заң мен тәртіп» мәдениетін қалыптастыру, ұлттық бірегейлікті нығайту бағытындағы тапсырмаларының жергілікті жерде нақты іске асуының жарқын көрінісі. Сарыағаш ауданының Аналар кеңесі мен «О.Жәутіков» атындағы мектеп ұжымы бұл бағытта бірлесіп, жүйелі жұмыс атқарып келеді. Патриоттық әндерді айту арқылы бала тек музыкалық қабілетін шыңдап қана қоймайды, ол әннің мәтініне үңіледі. Сөздердің мағынасын ұғына отырып, өз елінің тарихына, батырларына, байтақ жеріне деген мақтаныш сезімін бейсаналы түрде бойына сіңіреді. «Айбын» байқауы – оқушылардың өнерге деген құлшынысын арттырып қана қоймай, олардың жүрегінде Отанға деген перзенттік мақтаныш сезімін ұялатқан нағыз тағылым мектебі болды. Бұл шараға ата-аналар да белсене қатысып, балаларының өнерін тамашалап, оларға қолдау көрсетті.