Бала – мемлекетіміздің болашағы, ұлтымыздың жарқын ертеңі. Әрбір баланың бақытты, қауіпсіз және үйлесімді ортада өсуі – тек ата-ананың ғана емес, бүкіл қоғамның алдындағы қасиетті парызы. Осы орайда, Сайрам ауданында «Адал ата-ана – қауіпсіз балалық шақ» тұжырымдамасын жүзеге асыру аясында өткен ауқымды ата-аналар форумы отбасы, мектеп және қоғам арасындағы ынтымақтастықтың жаңа кезеңін айқындап берді. Қ.Жандарбеков атындағы аудандық мәдениет үйінде өткен бұл жиын жай ғана кездесу емес, бала қауіпсіздігін қамтамасыз етудің стратегиялық жол картасын қалыптастырған маңызды диалог алаңына айналды.
Форумның стратегиялық мәні: Неге бұл маңызды? Десеңіз «Адал ата-ана – қауіпсіз балалық шақ» тұжырымдамасының басты мақсаты – баланың өміріне қауіп төндіретін факторларды ерте анықтау, отбасындағы құқықтық мәдениетті көтеру және ұлттық құндылықтар негізінде саналы ұрпақ тәрбиелеу. Форумда ата-аналарға жай ғана «баланы бағып-қағыңдар» деген ұран тасталған жоқ, оларға баламен қалай тиімді қарым-қатынас орнатуға болатыны, қиын жағдайларда психологиялық көмекті қалай көрсету керектігі жөнінде нақты құралдар ұсынылды.
Форум барысында ұйымдастырылған танымдық көрме көпшіліктің назарын аударды. Мұнда психологиялық жаттығулар, баламен сенімді байланыс орнатудың әдістері, сондай-ақ ата-аналарға арналған практикалық құралдар мен кітапшалар қойылды. Ата-аналар арнайы бейнероликтер арқылы отбасындағы эмоционалдық қолдаудың баланың тұлғалық дамуына тигізетін оң әсерін көзбен көріп, күнделікті өмірде қолдануға болатын психологиялық техникаларды үйренді.
Мектеп пен отбасы – тәрбиенің екі қанаты екніне ешкімнің де таласы жоқ болар. Бүгінгі форумды модератор ретінде жүргізген Сайрам ауданы білім бөлімінің әдістемелік кабинет меңгерушісі Құралай Мұсаева іс-шараның күн тәртібімен таныстыра келе, әрбір ата-ананың жауапкершілігі баланың болашағына тікелей әсер ететінін баса айтты.
Аудандық білім бөлімі басшысының тәрбие ісі жөніндегі меңгерушісі Фарида Алматқызы Оспанова «Бала тәрбиесіндегі отбасы мен мектептің бірлескен жауапкершілігі» тақырыбында баяндама жасады. Ол: «Мектеп – білім беретін ұя, ал тәрбиенің бастауы – отбасы. Егер осы екі институт бір-бірімен тығыз байланыста жұмыс істемесе, тәрбие үдерісінде олқылықтар орын алады. Біздің басты мақсатымыз – ата-ананы мектептің сенімді серіктесіне айналдыру», – деп атап өтті.
Қандай кезеңде болмасын заң үстемдігі және ата-ананың құқықтық жауапкершілігі жоғары сараланады. Сондықтан да, форумның ең өзекті бөлігі құқықтық тақырыптарға арналды. Аудан прокурорының орынбасары Мерлан Шотыков жасөспірімдер арасындағы құқық бұзушылықтың алдын алудағы ата-ананың тікелей жауапкершілігін еске салды. Ол түнгі уақыттағы балалардың жүріс-тұрысына қатаң бақылау жасау, интернеттегі қауіпсіздік ережелерін сақтау және «буллинг» сияқты әлеуметтік дерттің заң алдындағы салдары туралы ашық айтты.
Ал аудандық полиция басқармасының өкілдері, полиция майоры А.Ахметов және полиция аға лейтенанты С.Маханбет «Қауіпсіз қоғам – қауіпсіз бала» бағытында маңызды кеңестер берді. Әсіресе, жол қауіпсіздігі, жазғы демалыс кезіндегі балалардың бос уақытын ұйымдастыру және отбасылық-тұрмыстық зорлық-зомбылықтың алдын алу бойынша заңнамалық түсіндірмелер ата-аналар үшін өте құнды болды. Зорлық-зомбылық – отбасының ішкі шаруасы емес, ол қоғамдық мәселе және заңмен қорғалуы тиіс құқықтық кеңістік.
Эмоционалдық саулық және ұлттық тәрбие баланың физикалық денсаулығымен қатар, оның жан дүниесінің саулығы да маңызды. №50 Н.Тлендиев атындағы мектептің педагог-психологі Ғ.Омаров баланың эмоционалдық қауіпсіздігі ата-ананың жылы сөзі мен шынайы қолдауынан басталатынын жеткізді. Одан кейін №52 М.Өзтүрік атындағы мектептің психологі Ж.Хыдырова өткізген «Бақытты отбасы – қауіпсіз балалық шақтың бастауы» атты тренингі ата-аналарға баламен қалай дұрыс сөйлесу керектігін практика жүзінде көрсетті.
Денсаулық сақтау маманы М.Ибрагимова болса, дұрыс тамақтану, зиянды әдеттерден аулақ болу және психикалық денсаулықты сақтау бойынша медициналық тұрғыдан кеңес берді. Ал аудандық ата-аналар комитетінің төрағасы А.Тұрлыбеков «Отбасындағы адалдық пен ұлттық құндылықтар» тақырыбындағы сөзінде қазақы тәрбиенің, үлкенді сыйлаудың және адалдық принципінің бала болашағы үшін қаншалықты маңызды екеніне тоқталды.
Болашаққа бағытталған жоспар мен «Қауіпсіз аула» және жедел әрекет мәселесі бойынша форум соңында бала қауіпсіздігін күшейтуге бағытталған нақты іс-шаралар тізбесі жарияланды. Атап айтсақ, «Қауіпсіз аула» акциясы: 18-29 маусым аралығында аудандық Орталық саябақта өтетін бұл акция балалардың бос уақытын пайдалы әрі қауіпсіз өткізуге бағытталған. «Ата-ана бақылауы» бағдарламасы: Ата-аналарға баланың гаджеттерін бақылау және интернеттегі қауіпті сайттардан қорғау бойынша техникалық кеңес беру. «Жедел желі» форматы: Қоғамдық орындарда ата-аналар мен мамандардың тікелей байланысын қамтамасыз ететін кездесулерді тұрақты өткізу. Су айдындарындағы қауіпсіздік: Жазғы маусымдағы ең үлкен қауіптердің бірі – суға шомылу мәдениеті мен қауіпсіздігі бойынша түсіндіру жұмыстарын күшейту.
Сайрам ауданында өткен бұл ата-аналар форумы – өскелең ұрпақтың тағдырына бейжай қарамайтын, олардың жарқын болашағы үшін аянбай еңбек ететін қоғамның үні. Мектеп, ата-ана және құқық қорғау органдарының арасындағы мұндай тығыз ынтымақтастық қана балаларды қауіпсіз ортамен қамтамасыз ете алады.
«Баланың қауіпсіздігі – баршамыздың ортақ міндетіміз!» – деген ұранмен аяқталған бұл форум, әрбір ата-ананың жүрегінде «Мен өз балам үшін не істей аламын?» деген сұрақтың жауабын табуға көмектескен, тәрбие ісіне жаңа серпін берген ірі оқиға болды. Еліміздің болашағы – білімді, салауатты, ұлттық құндылықтарын ардақтайтын ұрпақтың қолында. Ал сол ұрпақтың амандығы – біздің адал қызметіміздің жемісі.